Singapore ရောက်ပြီး အလုပ်အဆင်မပြေရင် ဘယ်လိုကူညီပေးမလဲ

ဒီစနစ်က အိမ်ရှင်ဘက်ကိုပဲ ကာကွယ်ပေးတာမဟုတ်သလို အိမ်အကူဘက်ကိုပဲ ကာကွယ်ပေးတာလည်း မဟုတ်ပါဘူး။

ဘာဖြစ်ခဲ့လဲ၊ မသွားခင် ဘာတွေသဘောတူထားလဲ၊ ဘယ်သူ့ဘက်က ဘာတာဝန်ရှိလဲဆိုတာကို ကြည့်ပြီးမှ ဆက်လုပ်ရမယ့်နည်းလမ်းကို ဆုံးဖြတ်ပါတယ်။

အဆင်မပြေတာကို အရမ်းဆိုးသွားတဲ့အထိ တိတ်တိတ်မနေပါနဲ့။ အောက်ပါအခြေအနေတွေရှိရင် mingalarSG ကို စောစောပြောပါ။

• အိမ်ရှင်ပြောတာ နားမလည်တာ

• အလုပ်လုပ်ပုံ မတူတာ

• ကိုယ်မတတ်သေးတဲ့အလုပ်ရှိတာ

• အလုပ်တာဝန်နားလည်မှု မတူတာ

• အိမ်ရှင်နဲ့ ဆက်ဆံရေး မကောင်းလာတာ

• စိတ်ဖိစီးမှုများလာတာ

အိမ်ရှင်ပြောတာတစ်ခုတည်းနဲ့ အိမ်အကူအပြစ်လို့ မဆုံးဖြတ်ပါဘူး။ အိမ်ရှင်ဘက်နဲ့ အိမ်အကူဘက်ကို သီးသန့်မေးမြန်းပြီးမှ အခြေအနေကို သေချာကြည့်ပါတယ်။

အိမ်ရှင်နဲ့ Interview လုပ်တဲ့အချိန်မှာ ကိုယ်သွားလုပ်ရမယ့်အလုပ်တွေကို သေချာမေးပြီး နားလည်ထားရပါမယ်။

• ကလေးကြည့်ရမလား

• သက်ကြီးရွယ်အိုကို ကူညီရမလား

• ဟင်းချက်ရမလား

• အိမ်သန့်ရှင်းရေး ဘယ်လောက်လုပ်ရမလဲ

• အဝတ်လျှော်၊ မီးပူတိုက်ရမလား

• ဈေးဝယ်ရမလား

• အိမ်မွေးတိရစ္ဆာန် ကြည့်ရမလား

• အိမ်မှာ လူဘယ်နှယောက်ရှိလဲ

• ကိုယ်အဓိကတာဝန်ယူရမယ့်အလုပ်က ဘာလဲ

Interview အောင်ချင်လို့ အကုန် “လုပ်နိုင်တယ်၊ ရတယ်” လို့ မပြောပါနဲ့။ နားမလည်တာကို ခန့်မှန်းပြီး “ရပါတယ်” လို့ မဖြေဘဲ ပြန်မေးပါ။

Singapore အိမ်အကူအလုပ်မှာ အောက်ပါသာမန်အခက်အခဲတွေ ဖြစ်နိုင်ပါတယ်။

• လူပင်ပန်းတာ

• စိတ်ပင်ပန်းတာ

• အိမ်ရှင်က အမှားကို ဆူတာ၊ ပြန်ပြင်ခိုင်းတာ

• ကိုယ်မတတ်သေးတာကို သင်ပေးတာ

• ကိုယ်လုပ်နေကျပုံစံနဲ့ မတူလို့ ပြန်လေ့လာရတာ

• အိမ်လွမ်းတာ

• ပျင်းတာ

• မိသားစုကို သတိရတာ

ဒီလိုအခက်အခဲတွေကြောင့် ချက်ချင်း “မလုပ်ချင်တော့ဘူး၊ ပြန်မယ်” လို့ တစ်ဖက်သတ်ဆုံးဖြတ်တာ မလုပ်သင့်ပါဘူး။

ဒီသတ်မှတ်ချက်က အိမ်အကူကို အတင်းအလုပ်လုပ်ခိုင်းဖို့ မဟုတ်ပါဘူး။ Singapore အိမ်အကူအလုပ်ဟာ စိတ်ပြောင်းတာနဲ့ ချက်ချင်းသွား၊ ချက်ချင်းပြန်လို့ရတဲ့ အလုပ်မဟုတ်ဘူးဆိုတာကို မသွားခင်ကတည်းက နားလည်ထားဖို့ ဖြစ်ပါတယ်။

အလုပ်အဆင်မပြေဖြစ်လာရင် ချက်ချင်းအိမ်ပြောင်းပေးတာ မဟုတ်ပါဘူး။ အရင်ဆုံး အောက်ပါအတိုင်း စစ်ဆေးညှိနှိုင်းပါတယ်။

• နှစ်ဖက်လုံးကို နားထောင်မယ်

• မသွားခင်ပြောထားတာကို ပြန်ကြည့်မယ်

• ပြဿနာရဲ့အကြောင်းရင်းကို ကြည့်မယ်

• ပြင်လို့ရရင် ညှိနှိုင်းမယ်

• သင်ယူဖို့လိုရင် အချိန်ပေးမယ်

အိမ်အကူဘက်က ပြင်းထန်တဲ့ပြဿနာမရှိဘဲ အရင်အိမ်ရှင်နဲ့ တကယ်မကိုက်ညီတော့တာ ဒါမှမဟုတ် အိမ်ရှင်ဘက်က အကြောင်းပြချက်ကြောင့် ဆက်လုပ်လို့မရတော့တာဆိုရင် အိမ်ရှင်အသစ်ရှာပေးဖို့ ကူညီနိုင်ပါတယ်။

အိမ်ရှင်အသစ်ရှာနေတဲ့အချိန်မှာ Singapore က အေးဂျင့်စီစဉ်ထားတဲ့ နေထိုင်ရာနေရာမှာ တစ်လခန့်အထိ နေထိုင်စောင့်ဆိုင်းရနိုင်ပါတယ်။

• အိမ်ရှင်အသစ်တွေနဲ့ Interview ဖြေရမယ်

• ကိုယ့်အတွေ့အကြုံကို အမှန်အတိုင်းပြောရမယ်

• မလုပ်ဖူးတာ၊ မလုပ်နိုင်တာကို ပွင့်ပွင့်လင်းလင်းပြောရမယ်

• အိမ်အသစ်ရဲ့ အလုပ်တာဝန်တွေကို နားလည်ပြီးမှ လက်ခံရမယ်

အောက်ပါအခြေအနေမျိုးဆိုရင် Singapore မှာ အိမ်ရှင်အသစ်ဆက်ရှာပေးမယ့်အစား ရန်ကုန်ပြန်လာရနိုင်ပါတယ်။

• သင့်တော်တဲ့အကြောင်းပြချက်မရှိဘဲ အလုပ်မလုပ်တော့တာ

• မသွားခင်သဘောတူထားတဲ့ အဓိကအလုပ်တွေကို အကြိမ်ကြိမ်ငြင်းတာ

• သင်ပေးတာကို လုံးဝမလေ့လာချင်တာ

• သင့်တော်တဲ့ အလုပ်ညွှန်ကြားချက်တွေကို တမင်မလိုက်နာတာ

• ခိုးယူတာ

• ပြင်းထန်စွာ လိမ်ညာတာ

• ပြင်းထန်တဲ့ စည်းကမ်းဖောက်ဖျက်မှုလုပ်တာ